Cartas a Fonsu

Los nuesos tsibros

     Dious quera qu'al presente t'alcuentres bien.Nos vamus
tranpalantrán.
     Taba you apingayando, antes de facer unos bruyos de yerba, ya digu
pante mí: fai cuase un añu que nun escribu dúas letras a Fonsu, dende la
suronda pémeque, ya cuneso, cumu él ya muy aplicáu, pur nun gastar nu
taléfanu, tampoucu da siñal de vida. Taba you cavilando que de güey nun
pode pasar.
     Mira, afiáu, tábamus deixandu el mal de las vacas tsourias ya,
cunesu, venu la peste de lus gochus.Las dúas prubeteirías xuntas. Non,
tener tien que ver. ¡S'Antón de la Gocha ya Antón del Gochu tsevantasen
la cabeza! Cumu nu trabayu que fais prehí, pémeque nin satsas el maíz
nin curas la yerba, vou mandate pu l'Alsa un manegáu de tsibrus feitus
acó, pa que nun esqueizas cuandu trabayabas cu'l tsabeguín.
     Mándute, el primeiru, un tsibru de poisías, escritu pur Sabela
Fernández, de ca Faxu, de Caeras. Tsámase "Lluz d'amanecer", cun unus
santus muitu bien dibuxáus por Manulo Linares, el fíu de Lulo'l Nietu.
Tsibru muitu bien feitu de manera, pur las poisías ya pur los dibuxos.
Recuéise n'el to las cousas vieyas que tamus deixandu esqueicidas pur lu
pigarzosus ya carchelus que somos. Aquí, n'esta redolada quedan más
falas qu'ahí na Suiza.D'algunus rinse que'statsan de lus que queremus
que nun se perda todu. Estas falas son más riqueza que prubeteiría. Lus
mozus escriben en castetsanu ya'n bable central, cuase todus. Peru
quedan d'algunas muyeres qu'escriben na fala de Fernán Coronas, nel
bable occidental: Eva González, Nené Losada ya Sabela Fernández. Ya lo
dixu Nietzsche, las muyeres son muito más plantadas que los homes. Anque
ta bien que se escriba en to las falas. Nu manegáu de tsibrus, que daréi
a Ramonín, pa que te lus deixe na Suiza, van, tamién, poisías en
castetsano, de Román de la Carril ya de José Méndez de La Rubiera,
tamién bien feitas. Nu astur- galaicu, van p'atsó entrambus tsibrus de
Galanu ya de Antúnez. Más de mediu manegáu  vey chen d'escritores de
Tineu: Miguel Angel Rojo, Antón García, Alfonso Velázquez, Xuan Bello de
Paniceiros, Rafael Lorenzo,Tino el Rufo ya Taresa Lorences. Ya deixu, pa
outru manegáu, a lus de Cangas, Salas ya Belmonte. Cumu ves, naide tsee
nada, pu la condelgada TV, peru escribir sí, purqu'hay escritores de
muitu brazo ya bona cabeza. Inda menus mal.
        Ya cunesu alón.